Kuri uyu wa kane tariki ya 28 Gashyantare 2019 nibwo Urukiko rukuru urugereko rwihariye rushinzwe kuburanisha ibyaha mpuzamahanga n’ibyambukiranya imbibi rukorera i Nyanza rwagombaga gusoma imyanzuro y’urubanza ruregwamo abayislam baregwa gukorana n’imitwe y’iterabwoba.
Urukiko rwasomye icyemezo rwafashe gisobanura ko isomwa ritakibaye kubera impamvu zitandukanye zirimo kuba kopi y’uru rubanza itaranozwa.
Urukiko rwafashe icyemezo ko nyuma y’izo mpamvu rusubitse isomwa ry’uru rubanza rikazasomwa tariki ya 22 Werurwe 2019, isaa yine za mu gitondo.
uru nirwo rukiko ruburanisha baregwa ibyaha mpuzamahanga n’ibyambukiranya imbibi
Umucamanza yatangarije abari baje gukurikirana iryo somwa, ko ntako batagize kandi ko bakoze amanywa n’ijoro kugira ngo iyi tariki bazabe bashoje, ariko ntibyabakundira ariko abizeza ko mu byumweru bibiri bazaba barangije gukosora udukosa twose no kunoza dosiye yose.
Umucamanza uyoboye inteko iburanisha kandi yavuze ko guhabwa dosiye yuzuye imeze neza biri mu nyungu z’urukiko n’abaregwa muri uru rubanza.
Imiryango yabafunzwe ndetse n’inshuti zabo bavuze ko bazakomeza kwihanganira issubikwa ry’uru rubanza ariko na none bifuza ko mu byumweru bibiri uru rubanza rwasomwa rukava mu nzira .
Imiryango n’inshuti z’abafunzwe yari yaje gukurikirana iri somwa
Uru rubanza rwapfundikiwe tariki ya 30 Nyakanga 2018 rwasubitswe bwa mbere tariki tariki ya 14 Ukuboza 2018.
abaregwa bose bi 40, bari bahibereye uretse abafungiwe muri gereza ya Musanze.
