Kuri uyu wa kane tariki ya 13 Gicurasi 2021 nibwo abayislam bo hirya no hino mu gihugu bizihije umunsi mukuru wa iddil Fitri,aho ku rwego rw’igihugu bawizihirije kuri stade ya Kigali i Nyamirambo, ni umunsi kandi witabiriwe n’abayislam bake mu bari bateganijwe kuhakorera isengesho.
Kubera imvura isengesho rya iddil fitri ryatinzeho igihe cy’isaha n’igice ku cyari giteganijwe saa moya riyoborwa na sheikh Hitimana Salim ryabaye rigufi cyane bitewe no kuba ikibuga cyari cyari kirimo amazi.
Mu ijambo rye Sheikh Hitimana Salim yasabye abayislam kongera ibikorwa bigamije kwigira mu rwego rwo kurushaho kwiteza imbere no guteza imbere abandi, mu rwego rwo kurushaho kuzamurana no gukomeza guhangana n’ingaruka z’icyorezo cya covid19 ikomeje kwibasira isi yose.
Sheikh Hitimana Salim yavuze ko RMC ifite gahunda yo kubaka inzu y’ubucuruzi izwi ku izina rya Waqfu,ariko agasaba abayislam kuba abafatanyabikorwa b’iki gikorwa ari nacyo ikivuyemo kizajya gifasha abayislam mu kwiteza imbere.
Mufti Salim yasabye abayislam ko mu gihe bishimira isozwa ry’ilayidi bagomba no kuzirikana kudatumirana mu rwego rwo kwirinda ikwirakwiza ry’icyorezo cya covid19,anasaba abayislam kuba mu ba mbere bakomeza guhangana n’iki cyorezo.
Hari hashize ukwezi abayislam bari mu gisibo cy’ukwezi kwa ramadhan kwatangiye tariki ya 13 Mata 2021, kukaba ari ukwezi abayislam bibombarika cyane aho bakoramo ibikorwa byiza birimo gufashanya no gusingiza Imana cyane.
