Kuri uyu kabiri nibwo abatalibani baheruka gufata ubutegetsi mu gihugu cya Afghanistan nyuma y’imyaka 20 babukuweho bashyizeho abagize guverinima bayobowe na Mullah Muhammad Hassan Akhund nka minisitiri w’intebe w’agateganyo, ni umwe kandi mu bashinze uyu mutwe w’abatalinan.
Bbc dukesha iyi nkuru iravuga ko muri iyi guverinoma nta mugore ugaragaramo ndetse imyanya ikomeye ikaba irimo bamwe mu bayobozi bakomeye muri uyu mutwe w’abatalibani.
Hassan Akhund wagizwe minisitiri w’intebe w’agateganyi w’iki gihugu yahoze ari minisitiri w’ububanyi n’amahanga muri leta y’Abataliban hagati y’umwaka w’1996 na 2001 ubwo USA yabagabagaho ibitero bikomeye mu mugambi wayo wo guhashya iterabwoba.
Muri iyi guverinoma yashyizweho mu buryo bw’agateganyo, igaragaramo bamwe mu bataliban bafatiwe ibihano na leta zunze ubumwe z’amerika ndetse n’umuryango w’abibumbye, bamwe muri bo ni nka Sirajuddin Haqqani wagizwe minisitiri w’umutekano akaba aregwa kuba mu mwaka 2017 yarateguye igitero cyahitanye abantu 150 harimo abanyamerika, akaba ashakishwa na FBI.
Mu bandi bashyizweho harimo Mullah Yakubu wagizwe minisitiri w’ingabo akaba ari umuhungu wa Mullah Omar washinze umutwe w’Abataliban, wamenyekanye nyuma y’urupfu rwa se mu mwaka 2015.
Mullah Abdul Ghani Baradar wagizwe uwungirije minisitiri w’intebe wanagaragaye cyane mu biganiro Abataliban bagiranye na USA muri Qatar.
Amir Khan Muttaqi wagizwe minisitiri w’ububanyi n’amahanga nawe wari umwe mu bari mu biganiro by’i Doha, akaba umwe mu bayobozi bakomeye b’abataliban.
Nubwo hashyisweho abagize Guverinoma, umuvugizi w’abataliban avuga ko kuba nta mugore ugaragara muri iyi guverinoma ari uko ikiri iy’agateganyo, cyakora ibihugu bitandukanye cyane cyane ibyo ku mugabane w’iburayi byatangaje ko bitazemera Leta ya Afghanistan, ariko Leta zunze ubumwe z’Amerika zo zivuga ko zishobora gukorana nabo.
Kuri ubu Ambasade z’ubushinwa n’uburusiya nizo zakomeje gukorera muri kiriya gihugu kuva Abanyamerika bakurayo ingabo zabo zari zimaze imyaka 20 zihanganye n’abatalibani.
