Urubanza ruregwamo Munderere Ally wigeze kuba Imam wungirije w’umujyi wa Kigali mu mwaka w’2013 kugeza mu mwaka 2016 rurasomwa kuri uyu wa gatanu tariki 11 Mutarama 2019, mu rukiko rw’ikirenga.
Munderere Ally aregwa ibyaha bibiri birimo amacakubiri n’ivangura no guteza imvururu cyangwa n’imidugararo muri rubanda.
Ni urubanza rwatangiriye mu rukiko rukuru i Kigali, mu kwezi kwa kane mu mwaka 2017 aho ubushinjacyaha bwamuregaga ibyaba birimo amacukubiri no guteza imvururu n’imidugararo muri rubanda, ibi byaha byombi urukiko rukuru rwari rwabimuhamije rumukatira imyaka 10, ariko ibi byaha byombi arabijuririra.
Ku cyaha cy’amacakubiri, ubushinjacyaha bwavugaga ko Munderere nabo bari bafatanyije bashinze ishyirahamwe ryitwa ADP ryari rigamije kubona imyanya muri AMUR yahindutse RMC, no kuryanisha abanyamuryango ba AMUR, cyakora uyu mugabo yahakanye iki cyaha akiregura avuga ko ari abashaka kumufungisha gusa, barimo abo bakorana mu kazi k’idini.
Ubushinjacyaha bugaragaza ko ibyo Munderere Ally aregwa yabyiyemereye haba mu bugenzacyaha no mu bushinjacyaha.
Ku cyaha cyo guteza imvururu cg imidugararo muri rubanda, ubushinjacyaha bushingira ku butumwa bwari bubumbiye kucyitwa Link y’ikinyamakuru cyandikirwa hanze y’u Rwanda cyitwa rugari cyanditse iby’urupfu rwa Shany Mbonigaba wiciwe i Nyarutarama nyuma yo kurwana n’inzego z’umutekano.
Ubushinjacyaha buvuga ko iyo Link y’icyo kinyamakuru, Munderere yayishyize mu rubuga rwa whattsap y’abavugabutumwa b’idini ya Islam nka bumwe mu buryo bwo guteza imvururu, ariko we akabihakana akavuga ko yayizanye nta mugambi wo kugumura rubanda.
Ubushinjacyaha kandi buvuga ko mu bugenzacyaha no mu bushinjacyaha yavuze ko yashakaga kureba icyo bamwe mu bari kuri rubuga bayivugaho
Munderere n’umuwunganira mu mategeko Me Rwabukumba Mussa bavuga ko iki cyaha kitagafashwe nk’icyaha kuko ingingo ihana iki cyaha ivuga ubutumwa bwanditswe itavuga ibyanditswe n’ikinyamakuru, bityo bagasaba kuba abere ku byaha baregwa.
Munderere Ally yabaye Imam wungirije w’umujyi wa Kigali mu mwaka 2011,akorana sheikh Mushumba Yunusu wari Imam icyo gihe ndetse aza no gukorana na Sheikh Mussa Sindayigaya mu mwaka 2013 kugeza mu mwaka 2017 ubwo yatabwaga muri yombi.
Kuri uyu gatanu tariki ya 11 Mutarama 2019, urukiko rw’ikirenga rukaba ruzasoma imyanzuro yarwo kuri ibi byaha.
