Perezida Donald Trump kuri iki cyumweru yemeje ko umukuru w’umutwe wiyita leta ya kisilamu (IS) wari mu buhungiro yishwe n’ingabo z’iki gihugu mu majyaruguru ashyira uburengerazuba bwa Syria.
Avugira mu biro bye bya White House, Bwana Trump yavuze ko Abu Bakr al-Baghdadi yiciwe mu gitero cya gisirikare cy’Amerika.
Perezida Trump yavuze ko Baghdadi yiturikirijeho ikoti ritezemo ibisasu ku iherezo ry’ubuvumo amaze kugwa mu gico cy’ingabo kabuhariwe z’Amerika ejo kuwa gatandatu nijoro.
Iyicwa rya Baghdadi ni intsinzi ikomeye kuri Perezida Trump wanenzwe bikomeye muri uku kwezi nyuma y’icyemezo cyo gukura ingabo z’Amerika muri Syria, ndetse kuri ubu uri guhangana n’iperereza ryo kumweguza ryatangijwe n’abo mu ishyaka ry’abademokarate.
Umutwe wa IS wakoze ibikorwa by’ubwicanyi byahitanye abantu babarirwa mu bihumbi.
Uwo mutwe washyizeho ubutegetsi bugendera ku matwara akaze ku bantu bagera hafi kuri miliyoni umunani mu gace wagenzuraga ndetse ugaba ibitero mu bice bitandukanye byo ku isi. Mu ntangiriro y’uyu mwaka, Amerika yatangaje ko IS yatsinzwe.
Trump yongeyeho ko nta musirikare w’Amerika waguye muri icyo gitero, ariko ko bamwe mu bakoranaga bya hafi na Baghdadi na bo bapfuye.
Yavuze kandi ko hafatiwe “ibikoresho n’amakuru bikomeye cyane”.
Umuturage w’ahitwa Barisha, aho amakuru avuga ko icyo gitero cyabereye, yabwiye BBC ko indege za kajugujugu zarashe mu gihe cy’iminota 30 mu ijoro ry’ejo ku wa gatandatu, mbere yuko abasirikare batangira kurasira ku butaka. Yavuze ko izo ndege zarashe ku nzu ebyiri, imwe zirayishwanyuza.
Trump yongeyeho ko Baghdadi yari aherekejwe n’abana be batatu, kandi ko yiturikirijeho ikoti ritezemo ibisasu akabica bose.
Trump yavuze kandi ko iturika ry’ibyo bisasu ryashegeshe umubiri we uhinduka uduceduce, ariko ibizamini byagaragaje ko ari we koko.
Bwana Trump yanashimiye abarwanyi b’aba-Kurdes, Uburusiya, Iraq, Turukiya na Syria ku guha Amerika “ubufasha runaka” muri icyo gitero.
Nyuma yo gutangaza ko yivuganye umukuru wa Islamic state, igihugu cy’uburusiya cyo cyanze kwemeza ayo makuru, aho minisitiri w’ingabo w’iki gihugu Major-General Igor Konashenkov aho yavuze ko ayo makuru atayemeza.
Naho minisitiri w’itangazamakuru wa Iran Mohammed Javad Azari-Jahromi yavuze ko nta kintu na kimwe cyakozwe ko igikenewe ari ugusenya umusingi Al Baghdad asize yubatswe.
Umutwe wa Islamic state ntacyo uravuga ku makuru yatangajwe na Donald Trump yo kuba Amerika yahitanye umukuru wawo.
Source: Bbc na Aljazeera
