Kuva kuri uyu wa gatanu tariki 24 mata 2020, imbaga y’abayislam hirya no hino ku isi baratangira igisibo cy’ukwezi kwa Ramadhan, igisibo gisanze abayislam benshi muri gahunda ya “guma mu rugo” kubera icyorezo cya koronavirusi.
Mu itangazo ryashyizweho umukono na Mufti w’u Rwanda sheikh hitimana Salim, ritangariza abayislam ko kuri uyu wa gatanu aribwo igisibo cy’ukwezi kwa Ramadhan gitangira .
Miliyari z’abayislam ziri hirya no hino ku isi zitangiye igisibo, mu gihe isi yugarijwe n’icyorezo cya Korona, aho ibihugu bitandukanye byahagaritse ubuzima hafi ya bwose mu rwego rwo guhangana nacyo.
Uretse kuba binjiye muri uku kwezi, ibihugu byashyizeho gahunda ya guma mu rugo, byatangaje ko abayislam batazakora amasengesho y’ijoro mu mbaga nkuko bari basanzwe babikora, ibi bikaba bikomereza ku gukorera amasengesho imuhira.
Mufti w’u Rwanda Sheikh Hitimana Salim nawe yari yatangarije umuyoboro.rw ko abayislam bazakora igisibo birinda gusabana no gukora amasengesho ya n’ijoro kuko bishobora kuba impamvu yo gukwirakwira ry’iki cyorezo , bikaba binyuranyije n’amabwiriza yashyizweho na leta.
Igisibo cy’ukwezi kwa Ramadhan ni itegeko ku bayislam bose uretse abana, abarwayi, n’abari ku rugendo, gikorwa mu gihe cy’iminsi 30 cyangwa 29 bitewe n’uburyo ukwezi kwagaragaye kuko ariko baheraho basiba cyangwa bagasiburuka nyuma y’ukwezi.
