Leta zunze ubumwe z’abarabu (UAE) yahagaritse ingendo zose z’indege zaba izitwara abagenzi ndetse n’imizigo ziva zikanajya muri iki gihugu mu gihe cy’ibyumweru bibiri kubera ubwoba bw’icyorezo cya Coronavirus, bisabwe n’ikigo cyigihugu gishinzwe indege za gisiviri n’urwego rushinzwe ibibazo by’ibiza.
Mu itangazo ryashyizwe ahagaragara riravuga ko indege zitwara imizigo zizaba zihutirwa zo zizemererwa, ariko hakibandwa ku mabwiriza ya minisiteri y’ubuzima muri iki gihugu yo gukumira iki cyiza.
Rigira riti: “Isuzuma ry’ibizamini no gushyira mu kato bizatuma twongera kwemera ingendo z’indege, ibi kandi biri mu rwego rwo gushakira umutekano abagenzi, abakozi bakora mu ndege n’abakozi bo ku kibuga ndetse no kubarinda kwandura.”
Ku cyumweru, indege ya Emirates Airline yatangaje ko izakomeza gutwara abagenzi n’imizigo ariko ikabikora mu bihugu bike kugeza haje andi mabwiriza mashya, ahantu hose imipaka ifunguye kandi ibisabwe.
Al Arabiya iravuga ko Emirates airlines yisubiye ku cyemezo yari yafashe cyo gutwara abagenzi guhera tariki ya 25 Werurwe nyuma yo gusabwa na guverinoma n’abakiriya gutahana abagenzi.
Ku rubuga worldmeters rugaragaza amakuru y’abantu bamaze kwandura iyi Virus rugaragaza ko ibihugu byunze ubumwe by’abarabu UAE bifite umubare w’abantu 198 banduye Covid 19, ikaba imaze guhitana abantu babiri gusa mu gihe abantu 41 bayikize.
